Stór Focal Comhchoiteann um Sholáthar (CPV)

Príomhstór focal

Tá an príomhstór focal bunaithe ar struchtúr crainn ina bhfuil cóid suas le naoi ndigit a bhaineann le foclaíocht lena dtugtar cur síos ar na soláthairtí, na hoibreacha nó na seirbhísí is ábhar don chonradh.

• Sainaithnítear na rannáin leis na chéad dá dhigit (XX000000-Y);
• Sainaithnítear na grúpaí leis na chéad trí dhigit (XXX00000-Y);
• Sainaithnítear na haicmí leis na chéad cheithre dhigit (XXXX0000-Y);
• Sainaithnítear na catagóirí leis na chéad chúig dhigit (XXXXX000-Y);

Tugann gach ceann de na trí dhigit dheireanacha níos mó beachtais laistigh de gach catagóir.

Úsáidtear an naoú digit chun na digití roimhe sin a fhíorú.

Stór focal breise

Féadfar an stór focal breise a úsáid chun cur leis an gcur síos ar ábhar conartha. Bíonn na míreanna comhdhéanta de chód alfa-uimhriúil le foclaíocht chomhfhreagrach lenar féidir tuilleadh sonraí a chur isteach maidir le cineál sonrach nó ceann scríbe sonrach na n-earraí atá le ceannach.

Tá an cód alfa-uimhriúil comhdhéanta de na nithe seo a leanas:

• céad leibhéal ina bhfuil litir a fhreagraíonn do rannán;
• dara leibhéal ina bhfuil ceithre dhigit, agus tagraíonn na chéad trí cinn acu d’forannán agus úsáidtear an ceann deireanach chun críocha fíoraithe

An bhfuil sé éigeantach aicmiú CPV a úsáid sna foirmeacha caighdeánacha?

Tá úsáid CPV éigeantach san Aontas Eorpach amhail ón 1 Feabhra 2006.

Is é leagan CPV 2008 an leagan CPV atá ann faoi láthair chun an méid seo a leanas a dhéanamh:

1. Na fógraí faoi ghlaonna ar iomaíocht a líonadh isteach
2. Deiseanna gnó a chuardach in TED
3. Fógraí conartha a aimsiú i gcartlann TED

An chaoi le fógra a líonadh isteach le CPV maidir le glao ar iomaíocht

Ba cheart d’údaráis chonarthacha iarracht a dhéanamh an cód a oireann dá gceannach beartaithe a aimsiú chomh cruinn agus is féidir. Cé go bhféadfadh sé go mbeadh ar údaráis chonarthacha roinnt cód a roghnú i gcásanna áirithe, tá sé tábhachtach go roghnóidís cód amháin le haghaidh theideal an fhógra conartha. I gcás nach leor leibhéal cruinnis CPV, ba cheart d’údaráis chonarthacha tagairt a dhéanamh don rannán, don ghrúpa, don aicme nó don chatagóir lena dtugtar cur síos níos fearr ar a gceannach beartaithe, is é sin cód níos ginearálta is féidir a aithint toisc go bhfuil níos mó nialas ann.