Sit web uffiċjali tal-Unjoni Ewropea
Akkwist pubbliku Ewropew
Il-politiki
Il-politiki tal-akkwist pubbliku Ewropew jitfasslu mid-Direttorat Ġenerali għas-Suq Intern, l-Industrija, l-Intraprenditorija, u l-SMEs (DĠ GROW)
Id-Direttivi tal-UE dwar l-akkwist pubbliku, li l-prinċipji fundamentali tagħhom huma t-trasparenza, il-kompetizzjoni miftuħa, u l-ġestjoni proċedurali tajba, ikopru offerti li jkun mistenni li jkollhom valur ogħla minn limitu partikulari. Huma mfasslin biex ikollna suq tal-akkwist li jkun kompetittiv, miftuħ, u rregolat tajjeb — fatturi essenzjali biex il-fondi pubbliċi jintużaw tajjeb.
Is-Suppliment ta' Il-Ġurnal Uffiċjali tal-Unjoni Ewropea
L-offerti pubbliċi kollha b’valur ogħla mill-valuri speċifiċi tal-kuntratt iridu jiġu ppubblikati fis-Suppliment ta’ Il-Ġurnal Uffiċjali tal-Unjoni Ewropea (Serje S, Ġurnal Uffiċjali S, jew ĠU S) u madwar l-UE kollha.
Il-Ġurnal Uffiċjali S huwa disponibbli esklużivament f’format elettroniku u jinstab fil-website tat-TED. L-aċċess għat-TED huwa bla ħlas.
Minbarra l-offerti attwali, il-bażi tad-data tat-TED tippermetti aċċess għall-arkivji tas-serje S bil-lingwi kollha tal-UE. Interfaċċa ta’ tfittxija unika tippermettilek tagħżel jew iddaħħal aktar minn kriterju wieħed għat-tiftixa tiegħek, fosthom data ġeografika, it-tip ta’ dokument, in-natura tal-kuntratt, kelmiet ewlenin, u aktar.
Limiti
Il-limiti tal-valur tal-kuntratt li meta jinqabżu tkun trid tiġi ppubblikata sejħa għall-offerti madwar l-UE kollha huma stabbiliti fid-direttivi tal-UE. It-tabella li ġejja tipprovdi sommarju tal-valur tal-kuntratt (il-limiti) li japplika skont in-natura, is-settur, jew it-tip ta’ xerrej:
| Tip ta’ Kuntratt | Limitu 2024-2025 | Limitu 2026-2027 |
|---|---|---|
| Servizzi u provvisti għall-awtoritajiet tal-gvern ċentrali | €143,000 | €140,000 |
| Servizzi u provvisti għall-awtoritajiet tal-gvern reġjonali u lokali | €221,000 | €216,000 |
| Servizzi u provvisti għas-servizzi pubbliċi | €443,000 | €432,000 |
| Xogħlijiet pubbliċi | €5,538,000 | €5,404,000 |
Aktar informazzjoni dettaljata dwar il-limiti tinstab fil-paġna tad-Direttorat Ġenerali għas-Suq Intern, l-Industrija, l-Intraprenditorija, u l-SMEs tal-Kummissjoni Ewropea (DĠ GROW).
X’jiġi ppubblikat fis-Suppliment ta’ Il-Ġurnal Uffiċjali tal-Unjoni Ewropea?
Kull proċedura ta’ akkwist pubbliku tinvolvi diversi stadji. Skont il-bażi legali u t-tip ta’ proċedura, fil-verżjoni online tas-Suppliment ta’ Il-Ġurnal Uffiċjali tal-Unjoni Ewropea (TED) jiġu ppubblikati tħabbira waħda jew aktar (avviżi).
Il-proċeduri l-aktar użati jinvolvu avviż ta’ kompetizzjoni, li jinforma lill-offerenti potenzjali dwar il-proċedura u kif se titwettaq, u avviż ta’ għoti ta’ kuntratt, li jħabbar l-eżitu tal-proċedura lil, ngħidu aħna, il-fornituri li jkunu ffirmaw b’suċċess kuntratt max-xerrej pubbliku. Tipi oħrajn ta’ avviżi jinkludu avviżi ta’ ppjanar, avviżi minn qabel ta’ għoti dirett, kompetizzjonijiet ta’ disinn u modifiki fil-kuntratti, kif ukoll bidliet għal kull tip ta’ avviż.
Firxa wiesgħa ta’ xerrejja pubbliċi jippubblikaw l-avviżi tagħhom fit-TED, inklużi awtoritajiet ċentrali, reġjonali, lokali, u internazzjonali, kif ukoll korpi, impriżi pubbliċi, u organizzazzjonijiet oħrajn li huma kkontrollati jew sussidjati minn dawn l-awtoritajiet.
Kull sena jiġu ppubblikati kuntratti ta’ servizzi, provvisti, u xogħlijiet pubbliċi b’valur ta’ madwar €815-il biljun mill-awtoritajiet pubbliċi fl-UE, u kull jum tax-xogħol is-Suppliment tal-Ġurnal Uffiċjali jippubblika aktar minn 3,000 sejħa għall-offerti, għotjiet ta’ kuntratti, u avviżi oħrajn.
L-avviżi ppubblikati fit-TED ikunu ġejjin mill-bażijiet legali u setturi li ġejjin:
- Il-kuntratti pubbliċi ġenerali għal xogħlijiet, provvisti, u servizzi (id-Direttiva 2014/24/UE)
- L-akkwist minn entitajiet li joperaw fis-setturi tal-ilma, tal-enerġija, tat-trasport, u tas-servizzi postali (id-Direttiva 2014/25/UE)
- Il-konċessjonijiet (id-Direttiva 2014/23/UE)
- L-akkwist fl-oqsma tad-difiża u tas-sigurtà (id-Direttiva 2009/81/KE)
- Is-servizzi pubbliċi tat-trasport tal-passiġġieri bil-ferrovija u bit-triq (ir-Regolament (KE) Nru 1370/2007)
- L-akkwist mill-pajjiżi taż-Żona Ekonomika Ewropea li mhumiex membri fl-UE (in-Norveġja, l-Iżlanda, u l-Liechtenstein) (id-Deċiżjoni 94/1/KE, KEFA) u mill-Iżvizzera (id-Deċiżjoni 2002/309/KE, Euratom)
- L-akkwist minn pajjiżi kandidati tal-UE
- L-akkwist mill-istituzzjonijiet tal-UE (ir-Regolament (UE, Euratom) 2024/2509) u mill-Bank Ċentrali Ewropew (BĊE) (id-Deċiżjoni (UE) 2016/245)
- Il-proġetti ffinanzjati mill-Bank Ewropew tal-Investiment (BEI) u mill-Bank ta’ Żvilupp tal-Kunsill tal-Ewropa (CEB)
- Ir-reġistrazzjonijiet tan-negozju dwar Kumpaniji Ewropej (ir-Regolament (KE) Nru 2157/2001), is-Soċjetajiet Kooperattivi Ewropej (ir-Regolament (KE) Nru 1435/2003), u l-Gruppi Ewropej b’Interess Ekonomiku (ir-Regolament (KEE) Nru 2137/85)
- Leġiżlazzjoni oħra li tuża avviżi ta’ akkwist biex timmonitorja l-implimentazzjoni tagħhom, inklużi d-Direttiva dwar il-Vetturi Nodfa (id-Direttiva 2009/33/KE), ir-Regolament dwar is-Sussidji Barranin (ir-Regolament (UE) 2022/2560), l-Istrument ta’ Akkwist Internazzjonali (ir-Regolament (UE) 2022/1031), u d-Direttiva dwar l-Effiċjenza Enerġetika (id-Direttiva (UE) 2023/1791)
Nota
Mill-1 ta’ Jannar 2021 ’l hawn, l-awtoritajiet kontraenti u l-entitajiet kontraenti tar-Renju Unit ma jistgħux jibqgħu jippubblikaw avviżi ta’ akkwist fit-TED. Dan huwa l-każ għax ir-regoli tal-UE dwar l-akkwist pubbliku ma baqgħux japplikaw kemm għar-Renju Unit kif ukoll fi ħdanu.
L-avviżi ta’ akkwist relatati mal-proċeduri ppubblikati sal-31 ta’ Diċembru 2020 xorta se jiġu ppubblikati fit-TED peress li l-awtoritajiet kontraenti u l-entitajiet kontraenti tar-Renju Unit xorta jridu japplikaw il-liġi tal-UE għall-proċeduri li għaddejjin (jiġifieri dawk ippubblikati sal-31 ta’ Diċembru 2020). Għalhekk, huma jridu jibagħtu l-avviżi rilevanti tagħhom (eż. avviżi ta’ corrigenda, avviżi ta’ għoti ta’ kuntratti, avviżi ta’ modifika ta’ kuntratt) lit-TED.
